Një tjetër lajm i madh për futbollin e Kosovës vjen nga Gjermania. Talenti i ri, Igli Hyseni, po merr pjesë në prova tek një nga klubet më të mëdha në botë, gjigandi FC Bayern Munich.
Që nga dita e diel, Igli ndodhet në një kamp prove të organizuar nga klubi bavarez, ku po vlerësohet nga trajnerët e akademisë së Bayern Munich. Ky është një hap i rëndësishëm për futbollistin e ri, i cili po synon të dëshmojë potencialin e tij në një nga sistemet më të forta të zhvillimit të talentëve në Evropë.
Igli Hyseni është pjesë e gjeneratës U-13 të klubit KF Peja, një ekip që në vitet e fundit ka nxjerrë disa talentë premtues për futbollin kosovar.
Ky nuk është rasti i vetëm që nga KF Peja. Më herët, edhe Kaan Arapi është përzgjedhur për prova në një projekt të lidhur me akademinë e Barcelonës në kuadër të “Barça Clinic” në Barcelonë, duke dëshmuar se klubi pejan po shndërrohet në një bazë të rëndësishme të zhvillimit të talenteve të reja.
Pjesëmarrja e Iglit në Bayern Munich shihet si një mundësi e madhe për të ardhmen e tij, por edhe si një tjetër dëshmi e punës së bërë në përgatitjen e futbollistëve të rinj në Kosovë.
