Kualifikimi dramatik i Skocisë në Kupën e Botës 2026 pas një pritjeje prej 28 vitesh ka bërë që suksesi i kombëtares së futbollit të gdhendet zyrtarisht edhe në historinë monetare të vendit. Banka e Skocisë (Bank of Scotland) ka prezantuar sot një kartëmonedhë të re dhe ekskluzive prej 20 £ (paund), e cila mban imazhin e mesfushorit të Napolit, Scott McTominay, duke ekzekutuar golin e tij të famshëm me “gërshërë” (overhead kick).
Imazhi i kartëmonedhës është jetësuar nga ilustruesja skoceze Katie Smith dhe është frymëzuar nga goli spektakolar i 29-vjeçarit në minutat e para të ndeshjes vendimtare kundër Danimarkës (e cila përfundoi me fitoren 4-2 të Skocisë në Hampden Park), duke siguruar biletën për në Botërorin që do të mbahet këtë verë në SHBA, Kanada dhe Meksikë.
Një botim tejet i kufizuar për bamirësi
Ky model nuk do të jetë në qarkullim masiv. Banka ka konfirmuar se janë shtypur vetëm 100 copë të kësaj kartëmonedhe unike. Ndonëse ato teknikisht kanë vlerë ligjore monedhe, janë dizajnuar specifikisht si artikuj koleksioni për fansat:
- 25 kartëmonedha do të hidhen në një shorte publik ku çdo biletë kushton 10 £.
- 25 kartëmonedha (14 prej të cilave të nënshkruara personalisht nga vetë McTominay) do të shiten në një ankand online përmes shtëpisë së njohur “Spink & Son”.
- Të gjitha të ardhurat e mbledhura nga shorti dhe ankandi do të dhurohen 100% për organizatën bamirëse “Crisis”, e cila lufton pastrehimin në Skoci.
“Një ndjenjë e jashtëzakonshme”
I përfshirë direkt në projekt, ish-lojtari i Manchester United dhe ylli aktual i Napolit, Scott McTominay, u shpreh i prekur nga ky vlerësim:
“Të arrish në skenën më të madhe të futbollit botëror është ëndrra e çdo lojtari. Momente të tilla u përkasin të gjithë atyre që mbështesin ekipin, ndaj ta shoh golin tim të pasqyruar në një kartëmonedhë skoceze është diçka jashtëzakonisht speciale për mua.”
Nga ana tjetër, Emma Noble, kryetare e komitetit ekzekutiv në Bankën e Skocisë, shtoi se kartëmonedhat dhe futbolli janë pjesë e pandashme e identitetit dhe historisë skoceze, ndaj ky bashkim me një “prekje moderne dhe kreative” ishte mënyra ideale për të festuar rikthimin në Botëror për herë të parë që nga viti 1998.
Në Kupën e Botës 2026, Skocia do të rreshtohet në Grupin C, ku do të përballet me Brazilin, Marokun dhe Haitin.
