Përzgjedhësi i kombëtares së Spanjës, Luis de la Fuente, ka ndezur debate të ashpra në opinionin sportiv spanjoll dhe atë botëror, pas publikimit të listës me 26 futbollistët e ftuar për Kampionatin e ardhshëm Botëror, që do të mbahet në SHBA, Kanada dhe Meksikë.
Ajo që ka shkaktuar një “tërmet” të vërtetë mediatik është vendimi i guximshëm dhe i paprecedentë i teknikut spanjoll: në listën finale nuk figuron asnjë futbollist i vetëm i Real Madridit. Ky është një rast unik në historinë e futbollit spanjoll, pasi kurrë më parë “Furia e Kuqe” nuk kishte udhëtuar në një turne madhor pa pasur të paktën një përfaqësues nga Klubi Mbretëror.
Për ta bërë edhe më të dhimbshëm këtë vendim për tifozët e Realit, De la Fuente ka vendosur të mbështetet masivisht te rivali i tyre i përjetshëm, Barcelona. Plot tetë lojtarë nga klubi katalanas janë përfshirë në listë: Joan Garcia, Pau Cubarsi, Eric Garcia, Pedri, Dani Olmo, Gavi, Ferran Torres dhe Lamine Yamal.
Ky dominim absolut i Barcelonës ka sjellë edhe reagime mjaft interesante në rrjetet sociale. Insajderi më i famshëm i merkatos, Fabrizio Romano, ka shpërndarë një fotografi të listës duke e shoqëruar me një koment ironik që pasqyron realitetin e ri: “8:0 për Barcelonën”.
Nga ana tjetër, reagimet nga Madridi kanë qenë të menjëhershme dhe plot zhgënjim. Kandidati për president i Real Madridit, Enrique Riquelme, nuk e ka fshehur dot dëshpërimin e tij pas zyrtarizimit të listës.
“Kjo është një ditë e trishtë për Real Madridin. Shpresoj që një situatë e tillë të mos përsëritet kurrë më në historinë e klubit tonë,” deklaroi Riquelme.
Kujtojmë se Spanja do të garojë në Grupin H të Kampionatit Botëror, ku do të përballet me Kepin e Gjelbër, Arabinë Saudite dhe Uruguain, në një rrugëtim që tashmë ka nisur me tensione të larta jashtë fushës.
