Aplikacioni i njohur për navigim Waze po përgatitet të ndryshojë mënyrën se si drejtuesit kërkojnë destinacione, zgjedhin rrugët dhe raportojnë problemet në trafik. Përditësimet e reja do të mbështeten nga inteligjenca artificiale e Google, Gemini, e cila do t’i mundësojë aplikacionit të kuptojë më mirë kërkesat e shprehura me zë.
Një nga risitë kryesore është kërkimi më natyral për destinacione. Drejtuesit nuk do të kenë më nevojë të dinë emrin e saktë të një lokacioni apo adresën e plotë. Në vend të kësaj, ata mund të thonë me zë atë që kërkojnë, ndërsa Waze do të analizojë kërkesën dhe do të propozojë vendet më të përshtatshme.
Për shembull, përdoruesi mund të kërkojë një kafene që është e hapur në atë moment, një parking pranë një qendre tregtare apo një pikë karburanti me çmimin më të lirë në zonë. Gemini do të përpunojë kërkesën dhe do të ofrojë alternativa, ndërsa drejtuesi mund të zgjedhë destinacionin vetëm me komandë zanore.
Kjo veçori fillimisht po shpërndahet për anëtarët e komunitetit beta të Waze në pajisjet Android dhe iOS, ndërsa më vonë pritet të jetë në dispozicion për të gjithë përdoruesit në mbarë botën.
Waze do të mësojë preferencat e drejtuesve
Një tjetër ndryshim i rëndësishëm është personalizimi i rrugëve. Aplikacioni do të analizojë mënyrën se si përdoruesit kanë udhëtuar më parë dhe do t’u propozojë rrugë që përputhen me zakonet e tyre.
Nëse një drejtues zakonisht zgjedh autostradën në vend të rrugëve lokale me shumë ndalesa, Waze do ta marrë parasysh këtë dhe do t’i shfaqë këto alternativa më shpesh.
Megjithatë, përdoruesit do të kenë mundësi ta çaktivizojnë këtë funksion dhe të zgjedhin manualisht rrugët alternative.
Më pak ndërhyrje zanore gjatë udhëtimit
Për drejtuesit që bezdisen nga njoftimet e shumta zanore, Waze po sjell një mënyrë të re navigimi me udhëzime më të shkurtra.
Aplikacioni do të reduktojë numrin e njoftimeve dhe do të japë vetëm informacionet më të rëndësishme, si kthesat, rreziqet në rrugë dhe ndryshimet e korsive. Kjo do të ndihmojë ata që gjatë vozitjes dëgjojnë muzikë, radio ose podkaste.
Edhe kjo veçori po shpërndahet gradualisht në Android dhe iOS.
Problemet në hartë do të raportohen përmes bisedës
Waze tashmë lejon raportimin me zë të aksidenteve, kolonave të trafikut dhe pengesave në rrugë. Me ndihmën e Gemini, përdoruesit së shpejti do të mund të raportojnë edhe gabime në hartë.
Drejtuesit do të mund të thonë, për shembull, se një rrugë është mbyllur apo se një adresë nuk është më e saktë. Raportimet nuk do të ndryshojnë menjëherë hartën, por do t’u dërgohen redaktorëve lokalë të Waze për verifikim.
Kjo pritet ta bëjë më të lehtë përditësimin e hartave pa pasur nevojë për formularë të ndërlikuar.
Rrugë të veçanta për motoçiklistët
Një tjetër risi është mënyra e navigimit për motoçikleta. Waze thekson se rrugët ideale për një motoçikletë nuk janë gjithmonë të njëjta me ato për automjete.
Sistemi i ri do të përdorë inteligjencën artificiale për të llogaritur rrugë më të përshtatshme për motoçiklistët, duke marrë parasysh rrugicat e ngushta, gjendjen e asfaltit dhe pengesat specifike.
Motoçiklistët do të marrin paralajmërime për gropa, pengesa, kalime të ngritura për këmbësorë, ura të ngushta dhe pjesë të tjera potencialisht të rrezikshme të rrugës.
Ky funksion është aktualisht në dispozicion në disa vende si Argjentina, Brazili, Kolumbia, Malajzia, Meksika, Peruja dhe Filipinet. Kosova dhe shumica e vendeve evropiane ende nuk janë përfshirë në fazën e parë të shpërndarjes.
Me këto ndryshime, Waze synon të bëhet më shumë se një aplikacion navigimi, duke përdorur inteligjencën artificiale për ta bërë udhëtimin më personal, më të sigurt dhe më efikas.
