Mira Murati, ish-drejtoresha e teknologjisë (CTO) në OpenAI, ka prezantuar projektin e saj të parë madhor pas largimit nga kompania, duke lansuar modelin e inteligjencës artificiale “Inkling” përmes kompanisë së saj Thinking Machines Lab.
Murati u largua nga OpenAI në shtator të vitit 2024 për të ndjekur projektet e saj të pavarura. Pas gati dy vitesh zhvillimi, kompania që ajo themeloi në shkurt të vitit 2025 ka prezantuar Inkling, një model multimodal të inteligjencës artificiale, i trajnuar plotësisht nga e para.
Sipas njoftimit të kompanisë, Inkling është publikuar me qasje të hapur, duke i bërë të disponueshme për shkarkim të gjitha peshat (weights) e modelit për studiuesit, zhvilluesit dhe komunitetin global të AI-së.
Murati ishte një nga figurat më të rëndësishme në OpenAI dhe mori vëmendje të madhe ndërkombëtare në nëntor të vitit 2023, kur u emërua përkohësisht drejtoreshë ekzekutive (CEO) pas shkarkimit të Sam Altman nga bordi i kompanisë. Altman u rikthye në detyrë vetëm pesë ditë më vonë, ndërsa Murati vazhdoi si CTO deri në largimin e saj përfundimtar në vitin 2024.
Themelimi i Thinking Machines Lab u pa si një hap i rëndësishëm në industrinë e inteligjencës artificiale, duke pasur parasysh reputacionin dhe përvojën e Muratit në zhvillimin e disa prej teknologjive më të avancuara të AI-së.
Lansimi i Inkling shënon hyrjen zyrtare të kompanisë së saj në garën globale të inteligjencës artificiale, në një kohë kur konkurrenca mes kompanive teknologjike për zhvillimin e modeleve gjithnjë e më të fuqishme po intensifikohet.
