Është ndarë nga jeta inxhinieri pejan Rexhep (Manik) Begolli, një prej profesionistëve që për dekada dha kontribut të rëndësishëm në zhvillimin e industrisë metalpërpunuese në Kosovë.
Begolli, i lindur në vitin 1948, ishte ish-drejtor i disa prej fabrikave të njohura industriale dhe njihej si një inxhinier me përvojë e përkushtim, duke lënë gjurmë në zhvillimin e sektorit industrial dhe në edukimin profesional të shumë bashkëpunëtorëve.
Lajmin për ndarjen e tij nga jeta e ka bërë të ditur familja përmes një njoftimi publik.
“Me pikëllim të thellë njoftojmë familjarët, të afërmit dhe miqtë se sot u nda nga jeta babai, burri dhe gjyshi ynë i dashur, Rexhep (Manik) Begolli (1948–2026). Luftove deri në fund me forcë e dinjitet. Shpirti yt u prehtë në parajsë. Do të na mungosh përherë.”
Ndarja e tij nga jeta përbën humbje jo vetëm për familjen, por edhe për komunitetin profesional dhe industrial, ku ai gëzonte respekt për kontributin dhe përvojën e tij shumëvjeçare.
Familja ka bërë të ditur se për datën, orën dhe vendin e ceremonisë së varrimit do të njoftojë në një moment tjetër.
Redaksia e INKLIK Media i shpreh ngushëllimet më të sinqerta familjes Begolli, të afërmve, miqve dhe të gjithë atyre që patën fatin ta njohin dhe të bashkëpunojnë me të.
