Zhvillimet e fundit brenda Lidhjes Demokratike të Kosovës kanë nxitur reagime të ashpra në skenën politike lokale. Përmes një deklarate publike, Taulant Kelmendi ka komentuar përplasjet e brendshme ndërmjet kryetarit të LDK-së, Lumir Abdixhikut, dhe nënkryetarit njëherësh kryetarit të Pejës, Gazmend Muhaxherit.
Kelmendi ka bërë të qartë se këto fërkime janë tërësisht çështje të brendshme partiake të këtij subjekti dhe se nuk ka interesim se kush mban përgjegjësi për humbjet apo se si ata do t’i rregullojnë raportet mes vete. Sipas tij, vëmendja dhe prioriteti duhet të mbeten plotësisht te qytetarët dhe udhëheqja e qytetit.
Në reagimin e tij, ai ka potencuar se qëndrimi i tyre mbetet i pandryshuar dhe se komuna e Pejës ka nevojë urgjente për një qeverisje që punon për interesin publik e jo për klane të ngushta interesi, abuzime, përfitime apo ndërtime pa asnjë vizion afatgjatë. Kelmendi përfundoi duke thënë se qytetarët e Pejës meritojnë zhvillim të qëndrueshëm, transparencë të plotë dhe përgjegjësi llogaridhënëse, duke lënë anash betejat e klaneve politike që nuk sjellin asnjë rëndësi për mirëqenien e përgjithshme.
