Një ngjarje e pazakontë në Monterrey të Meksikës ka bërë xhiron e rrjeteve sociale, pasi një shofer u përplas me një mur pasi e ngatërroi një pikturë murale me një hyrje të vërtetë tuneli.
Në mur ishte realizuar një pikturë shumë realiste ku paraqitej personazhi i njohur i filmave vizatimorë Wile E. Coyote, duke krijuar një iluzion optik sikur aty ndodhej një tunel i hapur.
Sipas raportimeve, shoferja besoi se rruga vazhdonte përmes “tunelit” të pikturuar dhe vazhdoi drejt, por automjeti u përplas direkt me murin.
Fotot e makinës së dëmtuar pranë muralit u shpërndanë me shpejtësi në internet, ndërsa shumë përdorues e cilësuan rastin si një ironi të rrallë, pasi një skenë tipike nga filmat vizatimorë u kthye në një aksident real.
Muralja kishte rikrijuar pikërisht një nga truket klasike të Wile E. Coyote, i cili në filmat vizatimorë shpesh përpiqej të kapte Road Runner-in duke përdorur iluzione të ngjashme.
