Këngëtarja kolumbiane Shakira ka mahnitur publikun me performancën e saj në finalen e Kupës së Botës në futboll, ku u shfaq me një kostum unik të krijuar nga brendi i njohur Roberto Cavalli.
Veshja e saj, e realizuar nga drejtori kreativ i markës, Fausto Puglisi, ishte e punuar me rreth 200 mijë kristale Swarovski dhe me një printim të frymëzuar nga perëndimi i diellit. Për përgatitjen e kësaj krijese janë dashur më shumë se dy javë punë.
Kostumi ishte dizajnuar posaçërisht për skenën e madhe, në mënyrë që të reflektonte dritat e stadiumit dhe t’i mundësonte Shakirës lëvizje të lirshme gjatë koreografisë së saj të famshme.
Pjesë e veshjes ishte edhe një fund me të njëjtat nuanca dhe me detaje me thekë, i frymëzuar nga motivi “Rrezet e arta” i Roberto Cavallit.
Në performancë, Shakirës iu bashkuan edhe 34 valltarë, të cilët kishin veshje të përshtatura me skenografinë. Me flokët e saj karakteristike të lëshuara dhe një grim të thjeshtë, këngëtarja kompletoi paraqitjen elegante.
Me energjinë dhe koreografinë e saj, Shakira edhe një herë arriti të emocionojë publikun në skenën e një prej ngjarjeve më të mëdha sportive në botë.
