Sergio Ramos nuk është thjesht një legjendë në fushë, por tashmë edhe pronari i ri i klubit të tij të zemrës, Sevilla FC. Lajmi bombastik u konfirmua nga gazetari Víctor Fernández, pas një takimi vendimtar të mbajtur mëngjesin e kësaj të marte mes mbrojtësit dhe drejtuesve aktualë të klubit.
Marrëveshja: 450 milionë euro për 80% të aksioneve
Përmes fondit të tij të investimeve, “Five Eleven Capital”, Ramos ka arritur marrëveshjen për blerjen e 80% të aksioneve të klubit andaluzian. Vlera totale e këtij operacioni kap shifrën e jashtëzakonshme prej 450 milionë eurosh.
Dëshira e Ramosit është që procesi burokratik të mbyllet brenda një kohe rekord, në mënyrë që ai të marrë në dorë frenat e menaxhimit të klubit menjëherë. Optimizmi mes palëve kishte nisur që mbrëmjen e së hënës, ndërsa marrëveshja finale u cilësua vetëm si “çështje orësh”.
Ndryshimi vjen në një moment kritik
Ky lajm vjen në një periudhë delikate për Sevillan, e cila po lufton për mbijetesë në La Liga. Me vetëm tre xhiro deri në fund të kampionatit, situata në tabelë është tejet e tensionuar. Klubi aktualisht ka 40 pikë, por në dhomat e zhveshjes besohet se “duhet edhe një fitore” për të siguruar matematikisht qëndrimin në elitë.
Diferenca mes vendit të shtatë dhe të tetëmbëdhjetë është vetëm 9 pikë, gjë që tregon se çdo gabim mund të jetë fatal. Mundësinë e parë për të vulosur mbijetesën, Sevilla e ka këtë fundjavë në përballjen e vështirë kundër Villarrealit.
