Historia po përsëritet në “Santiago Bernabéu”. Trajneri legjendar portugez, Jose Mourinho, do të jetë sërish timonieri i Real Madridit. Lajmi, i cili ka tronditur opinionin sportiv, është bërë i ditur nga gazetari i njohur dhe insajderi i merkatos, Sacha Tavolieri.
Zyrtarizimi pritet javën e ardhshme
Sipas burimeve të Tavolierit, marrëveshja mes drejtuesve të klubit mbretëror dhe teknikut portugez është finalizuar plotësisht. Mourinho pritet të marrë zyrtarisht drejtimin e skuadrës për sezonin 2026/27, ndërsa konfirmimi zyrtar nga klubi parashikohet të bëhet gjatë javës së ardhshme. Ai do të zëvendësojë në këtë detyrë Alvaro Arbeloan, i cili erdhi në krye të pankinës në janar si pasues i Xabi Alonsos.
Mandati i dytë në shtëpinë e “Mbretërve”
Ky do të jetë mandati i dytë i Mourinhos në krye të Real Madridit. Gjatë aventurës së tij të parë (2010-2013), portugezi arriti rezultate mbresëlënëse, duke thyer dominimin e Barcelonës së Guardiolës. Në 178 ndeshje zyrtare në atë periudhë, ai regjistroi:
- 127 fitore
- 28 barazime
- 23 humbje
Rikthimi i tij shihet si një lëvizje strategjike e presidentit Florentino Perez për të rikthyer disiplinën e hekurt dhe karakterin fitues në dhomat e zhveshjes, në një kohë kur pritet një rindërtim i ri i projektit sportiv të madrilenëve.
