Çmimet e naftës në tregjet ndërkombëtare kanë shënuar një rritje rekord, të nxitura nga tensionet dhe përshkallëzimi i konfliktit në Lindjen e Mesme, si dhe frika për ndërprerje të furnizimit global me energji.
Në tregun amerikan, çmimi i një fuçie të naftës WTI është rritur me mbi 35% brenda një jave, duke arritur rreth 90 dollarë për fuçi, që konsiderohet një nga rritjet më të mëdha javore në dekada.
Ndërkohë, nafta referuese Brent është rritur rreth 28%, duke arritur afërsisht 92 dollarë për fuçi.
Analistët thonë se rritja e çmimeve lidhet kryesisht me rrezikun e ndërprerjes së furnizimit nga Lindja e Mesme, veçanërisht nëse tensionet ndikojnë në Ngushticën e Hormuzit, një nga rrugët më të rëndësishme për transportin e naftës në botë.
Ekspertët paralajmërojnë se nëse situata përkeqësohet, çmimi i naftës mund të kalojë edhe mbi 100 dollarë për fuçi, gjë që do të ndikonte drejtpërdrejt në rritjen e çmimeve të karburanteve dhe inflacionit në shumë vende të botës.
