Deponia e mbeturinave në Sferkë është përfshirë sërish nga zjarri, ndërsa dyshohet se flakët janë shkaktuar qëllimisht nga persona të papërgjegjshëm.
Zjarrfikësit dhe ekipet në terren po punojnë për lokalizimin e flakëve, ndërsa bëhet thirrje për identifikimin e përgjegjësve.
Sipas njoftimit, flakët kanë vështirësuar edhe procesin e zbrazjes së automjeteve komerciale, si dhe kanë shkaktuar pengesa të tjera në funksionimin normal të deponisë.
Në vendin e ngjarjes ndodhet Kryeshefi Ekzekutiv, Diedon Berisha, i cili po ndjek nga afër situatën dhe po koordinon veprimet e nevojshme për menaxhimin e saj.
Në shuarjen e zjarrit janë angazhuar edhe ekipet e zjarrfikësve, të cilat po punojnë pa ndërprerje për ta vënë situatën nën kontroll.
Përgjegjësit e deponisë kanë falënderuar zjarrfikësit dhe të gjithë të angazhuarit për reagimin e shpejtë dhe përkushtimin e treguar gjatë intervenimit.
Njëkohësisht, është kërkuar nga institucionet kompetente që të hetojnë rastin, të identifikojnë autorët e dyshuar dhe t’i nxjerrin ata para drejtësisë, duke e cilësuar zjarrvënien si një akt të papërgjegjshëm që rrezikon jetën e njerëzve, mjedisin dhe funksionimin e shërbimeve publike.
