Drejtoresha për Kulturë, Rini dhe Sport në Komunën e Pejës, Xhenet Syka Kelmendi, ka përfaqësuar këtë institucion në punimet e Asamblesë së Përgjithshme të Unionit të Bashkive, që u mbajt në Tetovë.
E deleguar nga kryetari i Komunës së Pejës, Gazmend Muhaxheri, ajo prezantoi praktikat dhe politikat e mira të qeverisjes lokale që po zbatohen në këtë komunë, duke vënë theks në zhvillimin kulturor, rinor dhe sportiv.
Ky takim i rëndësishëm rajonal mblodhi përfaqësues nga komuna të ndryshme, me synim shkëmbimin e përvojave dhe forcimin e bashkëpunimit ndërinstitucional.
Në fjalën e saj, Syka Kelmendi theksoi se dialogu i hapur, ndarja e praktikave të suksesshme dhe solidariteti institucional janë çelësi për ndërtimin e një qeverisjeje lokale më efikase dhe të qëndrueshme.
Ajo gjithashtu nënvizoi rëndësinë e bashkëpunimit në projekte ndërkombëtare, si dhe promovimin e kulturës dhe diversitetit, si vlera thelbësore për zhvillimin e rajonit.
Pjesëmarrja e Komunës së Pejës në këtë forum konsiderohet një hap i rëndësishëm drejt fuqizimit të rolit të saj në rrjetet rajonale dhe ndërkombëtare të bashkëpunimit lokal.
