Qyteti i Pejës sot po frymon me ngjyrat e festës dhe krenarisë, duke shënuar Ditën e Çlirimit. Në këtë përvjetor jubilar, qytetarë të shumtë, krerë institucionalë, përfaqësues të shoqatave të dala nga lufta e UÇK-së dhe personalitete publike janë bërë bashkë për të kujtuar ditën e madhe të triumfit dhe lirisë.
Aktivitetet festive kanë nisur që në orët e hershme të mëngjesit me homazhe pranë shtatoreve të heronjve dhe Varrezave të Dëshmorëve. Me vendosjen e kurorave me lule, u nderua sakrifica sublime e të gjithë atyre që dhanë jetën për çlirimin e qytetit dhe mbarë Kosovës.
Përveç ceremonive zyrtare dhe kujtimit të të rënëve, dita po përcillet edhe me një varg aktivitetesh kulturore e sportive të organizuara nën patronatin e Komunës së Pejës, të cilat po i japin qytetit një atmosferë të gjallë festive.
Në mesazhet e tyre, krerët lokalë dhe pjesëmarrësit kanë theksuar se rruga drejt lirisë ishte e gjatë dhe plot sakrifica, ndërsa sot, Peja feston e lirë, me sytë e kthyer drejt zhvillimit, rinisë dhe të ardhmes.
