Vetëm 24 orë pasi udhëtoi në Prishtinë për një vizitë zyrtare të nivelit të lartë dhe zhvilloi takime të rëndësishme me krerë shtetesh dhe qeverish, përfshirë kryeministrin Albin Kurti, presidenten Vjosa Osmani dhe udhëheqës të tjerë të Kosovës, ministrja e Punëve të Jashtme të Shqipërisë, Elisa Spiropali, është larguar nga posti i saj në qeveri nga kryeministri Edi Rama. 
Një lëvizje e befasishme në skenën politike shqiptare, e njoftuar sonte gjatë një reshuffle të gjerë qeveritar, ku kryeministri Rama ka bërë ndryshime në shtatë poste kyçe të kabinetit të tij. Nga këto ndryshime bie në sy shkarkimi i Spiropalit, e cila kishte sapo kryer vizitën e saj të parë zyrtare në Kosovë që nga formimi i ekzekutivit të ri. 
Në vend të saj, Ferit Hoxha është emëruar ministër i Jashtëm i Republikës së Shqipërisë, një rol që do të drejtojë politikën e jashtme dhe marrëdhëniet me partnerët ndërkombëtarë. 
Gjatë qëndrimit në Prishtinë më 25 shkurt, Spiropali shprehu angazhimin e Tiranës për forcimin e bashkëpunimit rajonal dhe zhvillimet strategjike, duke theksuar rëndësinë e projekteve infrastrukturore si hekurudha Gjakovë–Shkodër dhe përpjekjet për zgjerimin e njohjeve ndërkombëtare të Kosovës. 
Lajmi ka tronditur skenën politike, duke hapur një valë pyetjesh rreth motiveve të këtij shkarkimi të papritur, vetëm një ditë pas dhënies së sinjaleve të forta diplomatike në rajon. Analistë politikë dhe lexues po shqyrtojnë nëse kjo lëvizje lidhet me presionet e brendshme politike në Tiranë, apo një riorientim të politikës së jashtme të vendit.
Qeveria ende nuk ka dhënë një arsyetim zyrtar për largimin e Spiropalit, por emërimet e reja pritet të hyjnë në fuqi pas dekretimit kushtetues.
