Presidenti i Bjellorusisë, Aleksandër Lukashenko, ka deklaruar se Kievi nuk duhet të presë asnjë lloj aksioni ushtarak nga vendi i tij, duke i kërkuar njëkohësisht falje publike presidentit ukrainas, Volodymyr Zelensky, për deklaratat e tij të mëparshme të ashpra. Gjatë një interviste për televizionin “Al Arabiya”, të transmetuar nga agjencia shtetërore bjelloruse e lajmeve “Belta”, lideri bjellorus u përpoq të arsyetonte kërcënimet e tij të kaluara, duke pretenduar se ato ishin thjesht një reagim ndaj mesazheve që vinin nga Ukraina.
Sipas Lukashenkos, retorika e tij e ashpër erdhi si përgjigje ndaj kërcënimeve të pretenduara ukrainase për sulme me raketa dhe dronë brenda territorit të Bjellorusisë. Ai pranoi se mund ta ketë tepruar në disa momente, por shtoi se kishte heshtur për një kohë të gjatë përpara se të reagonte. Lukashenko u shpreh se kishte treguar mirëkuptim fillimisht, duke e konsideruar Zelenskyn si një lider të ri, pa përvojë ushtarake dhe nën një presion të jashtëzakonshëm, por u detyrua të përgjigjej kur kërcënimet ndaj tij u bënë të hapura.
Në mesazhin e tij direkt drejt kreut të shtetit ukrainas, Lukashenko shprehu keqardhje nëse fjalët e tij kishin shkaktuar fyerje, duke thënë se ndoshta nuk duhej të fliste aq ashpër me një lider që ndodhet në luftë. Megjithatë, ai shtoi se Zelensky duhet ta kuptojë se çdo veprim sjell pasojat e veta dhe se ai duhet të jetë shumë më i kujdesshëm në hapat dhe deklaratat që bën.
Kjo deklaratë e Lukashenkos shihet si një sinjal i mundshëm për uljen e tensioneve në kufirin verior të Ukrainës. Ai siguroi se Zelensky e di mjaft mirë që nga Bjellorusia dhe nga ai personalisht nuk do të ketë asnjë ndërhyrje ushtarake, por nënvizoi se pala ukrainase duhet të qetësohet dhe të ndalojë së provokuari popullin bjellorus.
