Në Komunën e Pejës është prezantuar sistemi i ri digjital për menaxhimin e lëndëve të brendshme, i cili synon të rrisë transparencën dhe efikasitetin në proceset administrative.
Drejtoresha e Drejtorisë për Administratë, Nita Panduri-Mullarama, bëri të ditur se projekti është realizuar pa asnjë kosto shtesë për komunën, në bashkëpunim me zyrtarin Avni Hajrizin.
Sipas saj, sistemi i ri mundëson ndjekjen në kohë reale të procedurave të pagesave ndaj operatorëve, si dhe digjitalizimin e plotë të lëndëve, duke eliminuar procedurat burokratike dhe përdorimin e dokumenteve fizike.
“Trajtimi i lëndëve bëhet sipas rendit kronologjik të pranimit, duke garantuar drejtësi dhe duke shmangur çdo formë të prioritizimit subjektiv. Po ashtu, sigurohet gjurmueshmëri e plotë e çdo veprimi dhe qasje e drejtpërdrejtë për të gjitha drejtoritë,” theksoi ajo.
Tutje, u bë e ditur se databaza është në përputhje me legjislacionin në fuqi dhe përfshin integrimin e buxhetit komunal, duke mundësuar kontroll më të madh financiar dhe parandalimin e obligimeve pa mbulim buxhetor.
Ky zhvillim konsiderohet një hap i rëndësishëm drejt modernizimit të administratës komunale dhe përmirësimit të shërbimeve ndaj qytetarëve./radiopeja/
