Tenisti numër një në botë, Jannik Sinner, ka triumfuar sërish në Wimbledon, duke mbrojtur titullin e fituar një vit më parë.
Tenisti italian mposhti në finale gjermanin Alexander Zverev me rezultatin 3:1 në sete, pas një përballjeje dramatike që zgjati gati katër orë. Rezultati sipas seteve ishte: 6:7, 7:6, 6:3 dhe 6:4.
Për Sinnerin kjo ishte titulli i pestë Grand Slam në karrierë, ndërsa triumfi erdhi pas një beteje të madhe, pasi Zverev i shkaktoi shumë vështirësi dhe fitoi setin e parë në “tie-break”.
Finalja nisi e barabartë, me të dy tenistët që ruajtën me siguri shërbimet e tyre. Zverev ishte më i saktë në momentet vendimtare të setit të parë dhe arriti të kalojë në epërsi.
Megjithatë, Sinner reagoi në setin e dytë, duke fituar “tie-break”-un dhe duke barazuar rezultatin. Në dy setet e fundit, italiani tregoi forcën dhe qëndrueshmërinë e tij, duke shfrytëzuar momentet kyçe për të marrë kontrollin e ndeshjes.
Me këtë fitore, Sinner vazhdoi dominimin ndaj Zverevit, duke regjistruar fitoren e nëntë radhazi në përballjet direkte mes tyre.
Triumfi në Londër konfirmon edhe një herë statusin e Sinnerit si lider i tenisit botëror dhe një nga lojtarët më dominues të gjeneratës së re.
