Ministrja e Kulturës dhe Turizmit, Saranda Bogujevci, ka vizituar fshatin Kishnicë për të parë nga afër ecurinë e punimeve në ndërtimin e Shtëpisë së Kulturës.
Ky objekt po ndërtohet me synimin për të ofruar një hapësirë moderne e cila do t’i shërbejë komunitetit lokal për aktivitete të ndryshme artistike, edukative dhe shoqërore. Sipas Bogujevcit, kjo qendër pritet të shndërrohet së shpejti në një pikë të rëndësishme për jetën kulturore të kësaj zone.
Përmes një postimi në rrjetet sociale, ajo ka ritheksuar zotimin e institucioneve për të investuar në infrastrukturën kulturore në çdo lokalitet.
“Qëllimi ynë mbetet i qartë: çdo komunitet të ketë hapësira dinjitoze për kulturë, art dhe zhvillim të jetës kulturore,” ka deklaruar Bogujevci.
Projekti në Kishnicë synon të pasurojë jetën publike të banorëve dhe të krijojë platforma të reja për zhvillimin e të rinjve dhe artistëve lokalë.
