Të gjithë pasagjerët në anijen turistike të prekur nga epidemia vdekjeprurëse e hantavirusit konsiderohen me rrezik të lartë si masë paraprake, njoftoi agjencia evropiane e shëndetit publik përpara ankorimit të pritur të anijes të dielën në Tenerife.
Anija turistike Hondius pritet të ankorohet në Tenerife. Tetë persona janë sëmurë, përfshirë tre që kanë vdekur – një çift holandez dhe një shtetas gjerman.
Është organizuar transport i posaçëm për pasagjerët asimptomatikë, të cilët do të jenë në vetëizolim dhe nuk do të lejohen të udhëtojnë me fluturime të rregullta komerciale, njoftoi Qendra Evropiane për Parandalimin dhe Kontrollin e Sëmundjeve.
Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, tha më parë se pasagjerët do të çohen në portin industrial të Granadillës dhe më pas do të transportohen në automjete të mbyllura nën mbikëqyrje përpara se të fluturojnë për në vendet e tyre të origjinës.
Anija turistike me flamur holandez HV Hondius nuk kishte raste të dyshuara midis 147 pasagjerëve të saj deri të enjten, sipas një përditësimi nga OBSH-ja, por periudha e inkubacionit, e cila mund të zgjasë deri në gjashtë javë, kërkon kujdes.
Hantavirusi zakonisht përhapet nga brejtësit, por në raste të rralla mund të kalojë nga një person te tjetri. Autoritetet shëndetësore kanë thënë se rreziku i përhapjes së virusit është i ulët.
