Avokati Gazmend Osaj ishte i ftuar në Universitetin “Haxhi Zeka” në Pejë, ku zhvilloi një bashkëbisedim me studentët dhe stafin akademik të Fakultetit Juridik, duke trajtuar tema me rëndësi nga fusha e drejtësisë.
Gjatë këtij takimi, Osaj ndau përvoja dhe njohuri profesionale lidhur me fazat e procedurës penale, çështjet e dhunës në familje si dhe rolin e avokatit në shoqëri. Një pjesë e diskutimit iu kushtua edhe fillimit të funksionimit të Gjykatës Administrative në Kosovë dhe rëndësisë së saj në sistemin juridik të vendit.
Ai vlerësoi interesimin dhe nivelin e lartë të njohurive të studentëve, duke theksuar se angazhimi i tyre është një tregues pozitiv për të ardhmen e profesionit juridik.
Në përfundim të takimit, u theksua nevoja për bashkëpunim të vazhdueshëm ndërmjet praktikës dhe akademisë, me qëllim fuqizimin e përgatitjes profesionale të studentëve dhe përafrimin e tyre me tregun e punës.
