Franca ka paralajmëruar se sulmet ndaj infrastrukturës civile iraniane, me të cilat ka kërcënuar presidenti i Shtetet e Bashkuara të Amerikës, Donald Trump, do të përbënin shkelje të së drejtës ndërkombëtare dhe do të çonin në përshkallëzim të rrezikshëm të situatës.
Ministri i Jashtëm francez, Jean-Noël Barrot, në një intervistë për France Info theksoi se sulmet ndaj objekteve civile dhe energjetike janë të ndaluara sipas rregullave të luftës dhe ligjit ndërkombëtar.
Ai paralajmëroi se një veprim i tillë do të nxiste reagim të menjëhershëm nga Irani, duke futur rajonin dhe ekonominë globale në një cikël të rrezikshëm përshkallëzimi dhe kundërpërgjigjesh.
“Një sulm ndaj infrastrukturës energjetike iraniane do të pasohej me masa hakmarrëse që do ta përkeqësonin edhe më shumë situatën, e cila tashmë është shqetësuese”, u shpreh Barrot, duke përmendur edhe rritjen e çmimeve të karburanteve si një tregues të tensioneve aktuale.
Ndërkohë, Shtetet e Bashkuara të Amerikës dhe Izraeli kanë qenë në qendër të zhvillimeve që nga fundi i shkurtit, ndërsa Donald Trump ka paralajmëruar edhe “shkatërrim të plotë” të infrastrukturës civile iraniane nëse nuk arrihet marrëveshje brenda afatit të vendosur.
Sipas mediave iraniane, në prag të skadimit të këtij afati janë raportuar sulme ndaj rrjetit të transportit në disa pjesë të vendit, ku janë goditur ura hekurudhore dhe autostrada.
