Fitorja e Ferrarit në Çmimin e Madh të Spanjës përfaqëson një nga momentet më rëndësishme të sezonit dhe dëshminë e parë serioze se skuadra nga Maranello po kap hapin me liderët. Pas një serie garash ku tregoi potencial por jo konsistencë, Ferrari, në një pistë që nuk fal, arriti më në fund të bënte bashkë shpejtësinë, strategjinë dhe besueshmërinë – të paktën me njërin bolid, atë të Sir Lewis Hamilton, i cili ndërpreu një agjërim prej 685 ditësh pa fitore.
Ajo që inkurajon më shumë është se Ferrari prej kohësh duket se zotëron një nga shasitë më të mira në rreshtim. Në Barcelonë kjo u pa qartë: bolidi ishte i qëndrueshëm në kthesat e gjata, menaxhoi shkëlqyeshëm gomat dhe lejoi pilotët të mbanin një ritëm konkurrues gjatë gjithë garës, veçanërisht Hamilton që shijoi shampanjën e fitores.
Përditësime që sjellin përparim, jo “hapa pas”
Surpriza më e madhe ishte neutralizimi i pikëve të forta të rivalëve. McLaren, që dominonte muajt e fundit falë menaxhimit të gomave, nuk arriti të impononte ritmin e tij. Nga ana tjetër, Mercedes nuk shfrytëzoi dot fuqinë e motorit në drejtëzat e pistës siç pritej. Shumë prisnin një duel McLaren-Mercedes në Spanjë, por Ferrari pati përgjigje për çdo gjë.
Merita e madhe i takon paketës prej tetë përditësimeve që skuadra solli në pistë. Pothuajse të gjitha ndryshimet sollën progresin e pritur – një problem i madh ky për Ferrarin në vitet e kaluara, kur paketat e reja shpesh sillnin “hapa pas” në vendosjen e makinës. Këtë herë, inxhinierët goditën në shenjë me drejtimin e zhvillimit.
Gjithashtu, strategjia ishte perfekte. Ferrari, shpesh i ironizuar në të kaluarën për gabime taktike, këtë herë mori vendime të sakta dhe të shpejta nga “pit wall”, duke maksimizuar ritmin pa rreziqe të panevojshme.
Të presim pistat e tjera
Megjithatë, kujdesi është i domosdoshëm. Barcelona është një pistë e mbushur me kthesa me shpejtësi të mesme, pikërisht aty ku makina e Ferrarit performon më mirë. Përgjigjen e vërtetë se sa ka përparuar skuadra do ta marrim në konfigurime të tjera pistash, veçanërisht aty ku kërkohet efikasitet më i lartë aerodinamik në drejtëza.
Fitorja jep arsye për optimizëm, por nuk e bën menjëherë Ferrarin favorit për titull. Megjithatë, pas një kohe të gjatë, ekziston ndjenja se Maranello nuk jeton më vetëm me premtime dhe nostalgji. Si në Spanjë, ashtu edhe në Monako, skuadra tregoi se progresi është real dhe se lufta për fitore në vazhdim të sezonit do të jetë shumë më interesante.
