Agjencia e Sigurisë së Aviacionit të Bashkimit Evropian (EASA) ka publikuar të mërkurën një paralajmërim për aviokompanitë që të shmangin fluturimet në hapësirat ajrore të Iranit, Irakut dhe Libanit, për shkak të tensioneve të vazhdueshme dhe rrezikut për përshkallëzim të mëtejshëm ushtarak mes Shteteve të Bashkuara dhe Iranit.
EASA bëri të ditur se udhëzimi për këto hapësira ajrore është në fuqi deri më 31 gusht.
Paralajmërimi i fundit i agjencisë vjen pas njoftimit të Gardës Revolucionare Islamike të Iranit (IRGC), e cila deklaroi se të mërkurën kishte sulmuar pozicione ushtarake amerikane në Bahrein dhe Kuvajt. Këto sulme pasuan një seri sulmesh amerikane ndaj Iranit, ndërsa më herët ishin raportuar edhe incidente me cisterna nafte në ngushticën e Hormuzit.
Presidenti amerikan Donald Trump deklaroi të hënën se Shtetet e Bashkuara ose do të arrijnë një marrëveshje me Iranin, ose do ta “përfundojnë punën”, duke përsëritur kërcënimin për veprime të mëtejshme ushtarake.
Sipas EASA-s, zbatimi i armëpushimit mes SHBA-së dhe Iranit mbetet i brishtë, ndërsa vendimi për kufizimin e fluturimeve bazohet në “nivelin e lartë dhe të vazhdueshëm të tensioneve si dhe mundësinë e veprimeve të tjera ushtarake”.
Agjencia evropiane paralajmëroi gjithashtu se, në rast të shkeljes së armëpushimit aktual, hapësira ajrore e Iranit mund të përballet me kërcënime të menjëhershme për sigurinë e fluturimeve.
