Bahreini dhe Kuvajti kanë dërguar avionë luftarakë për të goditur objektiva në Iran, si përgjigje ndaj sulmeve iraniane në territoret e tyre, raportoi The Wall Street Journal, duke cituar burime të njohura me zhvillimet.
Sipas raportit, të dyja vendet e Gjirit kanë goditur depo të dronëve dhe raketave në Iran. Ndërkohë, Emiratet e Bashkuara Arabe kanë ofruar mbështetje të inteligjencës dhe mbulim ajror mbrojtës gjatë operacioneve.
Po sipas gazetës, Emiratet dhe Arabia Saudite kishin ndërmarrë sulme ndaj Iranit që në ditët e para të konfliktit. Abu Dhabi thuhet se ka zhvilluar dhjetëra sulme ajrore, ndërsa ishte nën bombardime intensive me raketa dhe dronë nga Irani.
Përfshirja e Bahreinit dhe Kuvajtit do të shënonte një zgjerim të mëtejshëm të konfliktit në Lindjen e Mesme. Të dy shtetet kanë qenë ndër më të goditurat nga sulmet iraniane javët e fundit.
Bahreini, i cili vendosi marrëdhënie diplomatike me Izraelin përmes Marrëveshjeve të Abrahamit në vitin 2020, ka investuar vitet e fundit në forcimin e kapaciteteve të tij mbrojtëse. Nga ana tjetër, Kuvajti konsiderohet veçanërisht i ekspozuar për shkak të pozicionit strategjik pranë Ngushticës së Hormuzit dhe varësisë së madhe nga kjo rrugë detare për eksportin e naftës.
Ministria e Jashtme e Kuvajtit njoftoi më herët se Irani kishte goditur një central elektrik dhe një impiant për desalinizimin e ujit. Ekspertët paralajmërojnë se sulme më të gjera ndaj infrastrukturës kritike mund të shkaktojnë krizë të rëndë humanitare në vendet e Gjirit.
Raporti vlerëson se përfshirja ushtarake e Bahreinit dhe Kuvajtit nuk pritet të ndryshojë ndjeshëm rrjedhën e luftës, e cila është përshkallëzuar pas dështimit të armëpushimit të arritur në muajin qershor.
Ndërkohë, presidenti amerikan Donald Trump deklaroi për Axios se administrata e tij po shqyrton mundësinë e një “sulmi masiv” ndaj Iranit.
