UEFA ka ndëshkuar zyrtarisht klubin turk Fenerbahçe me një gjobë prej 10 milionë eurosh pas zbulimit të një sërë parregullsish dhe manipulimesh në operacionet financiare të klubit. Hetimi i Departamentit për Qëndrueshmërinë Financiare nxori në dritë skema mashtruese në kontratat e disa figurave kryesore, ku vëmendjen më të madhe e mori rasti i futbollistit Kerem Aktürkoğlu dhe trajnerit José Mourinho.
Sipas gjetjeve të UEFA-s, klubi ishte përpjekur të fshihte pagën reale të Aktürkoğlu, i cili përfiton 5.2 milionë euro neto në vit, duke e deklaruar atë në dokumentet zyrtare me një vlerë simbolike prej vetëm 1907 lirash turke në muaj, që paraqet minimumin ligjor në Turqi.
Ndonëse klubi u mbrojt me pretendimin se pjesa tjetër e shpenzimeve mbulohej nga marrëveshjet e biznesmenit Hakan Safi për të drejtat e imazhit, UEFA konstatoi se Fenerbahçe ka tejkaluar limitet e shpenzimeve dhe ka shkelur rregullat e “Financial Fair-Play”. Ky dënim vjen si një goditje e radhës financiare për klubin, i cili humbi gjithashtu 25 milionë euro nga mospjesëmarrja në Ligën e Kampionëve.
