Turqia ka reaguar ashpër ndaj deklaratave të zyrës së kryeministrit izraelit Benjamin Netanyahu lidhur me situatën në Siri, duke i cilësuar ato si përpjekje për të justifikuar sulmet ajrore izraelite ndaj territorit sirian.
Drejtoria e Komunikimeve e Republikës së Turqisë deklaroi se akuzat e bëra nga zyra e Netanyahut synojnë të legjitimojnë sulmet që, sipas Ankarasë, janë të paligjshme dhe cenojnë sovranitetin dhe integritetin territorial të Sirisë.
Reagimi i Turqisë vjen një ditë pasi avionët luftarakë izraelitë kryen tetë sulme ajrore ndaj pistës së aeroportit ushtarak Abu al-Duhur, në provincën Idlib, në veriperëndim të Sirisë. Sulmet shkaktuan dëme të konsiderueshme në infrastrukturën ushtarake të aeroportit.
Më herët, zyra e kryeministrit izraelit kishte deklaruar se Izraeli dhe Siria kishin arritur një marrëveshje për ruajtjen e një “status quo-je” në çështjet e sigurisë. Sipas Izraelit, Siria ishte pranë shkeljes së kësaj marrëveshjeje duke lejuar vendosjen e trupave turke në një bazë ajrore pranë Alepos.
Izraeli pretendon se e kishte paralajmëruar disa herë Damaskun se një hap i tillë do të përbënte kërcënim për sigurinë e tij, por paralajmërimet nuk ishin marrë parasysh.
“Izraeli nuk do të tolerojë kërcënime ndaj sigurisë së tij dhe do ta mirëprisnim rikthimin në status quo”, thuhej në deklaratën e zyrës së Netanyahut.
Ankara, megjithatë, i ka cilësuar këto pretendime si pjesë të politikës së Netanyahut, të cilën e përshkruan si “ekspansioniste dhe destabilizuese”.
Turqia ka akuzuar gjithashtu kryeministrin izraelit se po përdor çështjet rajonale për përfitime politike në prag të zgjedhjeve në Izrael.
Sipas Ankarasë, paqja e qëndrueshme në rajon mund të arrihet vetëm nëse Izraeli heq dorë nga politika e presionit dhe respekton të drejtën ndërkombëtare.
Turqia ka përsëritur ndërkohë se do të vazhdojë bashkëpunimin me qeverinë në Damask, me synim forcimin e paqes dhe stabilitetit në Siri.
“Turqia do të vazhdojë me vendosmëri të bashkëpunojë me qeverinë siriane mbi baza legjitime për vendosjen e paqes dhe stabilitetit dhe nuk do të lejojë destabilizimin e mëtejshëm të Sirisë”, thuhet në deklaratën e Ankarasë.
