Presidenti i Shteteve të Bashkuara të Amerikës, Donald Trump, ka njoftuar se Irani ka rrëzuar një helikopter ushtarak amerikan të tipit “Apache”, i cili po kryente një patrullë rutinë mbi Ngushticën e Hormuzit. Përmes një reagimi zyrtar, kreu i Shtëpisë së Bardhë ka paralajmëruar se Uashingtoni do të kthejë përgjigje ndaj këtij sulmi.
Sipas deklaratës së Trump, të bërë publike në rrjetin e tij social “Truth Social”, incidenti ka ndodhur gjatë natës së mbrëmshme, ndërsa dy pilotët që ndodheshin në bord kanë shpëtuar pa lëndime.
“Sapo u njoftova nga ushtria jonë e madhe se iranianët mbrëmë rrëzuan një nga helikopterët tanë shumë të sofistikuar Apache, teksa po patrullonte mbi Ngushticën e Hormuzit. Në të ndodheshin dy pilotë, të dy janë të sigurt dhe të palënduar. Megjithatë, Shtetet e Bashkuara duhet t’i përgjigjen këtij sulmi,” ka shkruar Trump.
Tensionet në Ngushticën Strategjike
Ngushtica e Hormuzit mbetet një nga pikat më të nxehta gjeopolitike në botë, ku kalon një pjesë e konsiderueshme e furnizimit global me naftë. Ky incident shënon një përshkallëzim të ri dhe serioz të tensioneve tashmë të larta mes Uashingtonit dhe Teheranit zyrtar.
Deri më tani, Pentagoni dhe autoritetet iraniane nuk kanë dhënë detaje shtesë mbi llojin e armatimit të përdorur për rrëzimin e helikopterit apo mbi natyrën e saktë të përgjigjes ushtarake që SHBA-të po përgatisin.
