Manchester United e ka nisur në mënyrën më të keqe sezonin e ri të Premier League, duke u mposhtur 2-0 në transfertë nga skuadra e sapo-promovuar e Hull Cityt. Për më tepër, paraqitja e dobët e “Djajve të Kuq” ka ngritur pikëpyetje të mëdha për përgatitjen fizike dhe taktike të skuadrës së Michael Carrick.
Ish-sulmuesi legjendar anglez Alan Shearer ishte veçanërisht kritik pas ndeshjes. Duke folur për BBC, ai tha se Manchester United nuk dukej i përgatitur për intensitetin që kërkon një ndeshje e Premier League.
“Manchester United ishte i tmerrshëm në çdo repart. Sidomos në sulm, ku nuk ofroi pothuajse asgjë. Në disa momente e kisha të vështirë të kuptoja se çfarë po përpiqeshin të bënin në fushë”, ishte vlerësimi i Shearer.
Ai vuri theksin veçanërisht te gjendja fizike e lojtarëve.
“E di që ishte ndeshja e parë e sezonit, por ishte shumë e qartë se u mungonte energjia. Nuk dukeshin të gatshëm. Që nga minuta e parë u pa se vetëm një ekip mund ta fitonte ndeshjen. Hull kishte energjinë dhe intensitetin”, tha ish-sulmuesi.
Sipas tij, United duhej të ishte përgatitur për një ndeshje të tillë, veçanërisht duke pasur parasysh se luante në transfertë ndaj një skuadre që sapo ishte ngjitur në elitën e futbollit anglez.
“Kur shkon si mysafir te një skuadër e sapo-promovuar, e di se çfarë të pret. Duhet të jesh në gjendje t’i përgjigjesh të paktën me të njëjtin intensitet. United nuk e bëri këtë. Nuk mund të përballohej me Hullin”, shtoi Shearer.
Hull shfrytëzoi dobësitë e United
Hull City e siguroi fitoren me dy gola në pjesën e parë. Semi Ajayi shënoi për 1-0, ndërsa Nobel Mendy dyfishoi epërsinë pak minuta më vonë. Të dy golat erdhën pas goditjeve standarde, duke ekspozuar dobësitë e United në mbrojtjen e situatave të tilla.
United kishte pjesën më të madhe të posedimit të topit, rreth 72 për qind, por nuk arriti ta shndërronte këtë dominim në raste të rrezikshme. Hull ishte më agresiv në duele dhe më efikas në momentet vendimtare.
Edhe rikthimi i Marcus Rashfordit nuk ndryshoi shumë. Sulmuesi anglez hyri në pjesën e dytë dhe pati disa momente të mira, por nuk arriti të ndihmonte Unitedin të shmangte humbjen. Ishte paraqitja e tij e parë për klubin që nga dhjetori i vitit 2024.
Carrick kërkon qetësi
Pavarësisht humbjes zhgënjyese, Michael Carrick u përpoq të shmangte panikun. Trajneri i Unitedit pranoi se skuadra nuk gjeti zgjidhjet e duhura, por theksoi se një humbje nuk duhet të ndryshojë të gjithë projektin.
“Dy goditje standarde na ndëshkuan sot. Ato vendosën ndeshjen. Do ta analizojmë dhe do të përmirësohemi. Duhet të vazhdojmë të punojmë dhe të ecim përpara”, deklaroi Carrick.
Ai pranoi gjithashtu se United duhet të gjejë përgjigje ndaj skuadrave që mbrohen në mënyrë kompakte dhe luajnë me intensitet të lartë.
“Duhet të gjejmë përgjigjet. Sot nuk arritëm të funksiononim siç duhet dhe nuk gjetëm zgjidhjet e duhura”, tha trajneri.
Carrick insistoi se humbja nuk është arsye për të krijuar dramë në klub.
“E kuptoj që kemi humbur dhe se do të ketë shumë pyetje, por kjo nuk do të thotë se gjithçka është gabim vetëm sepse kemi humbur një ndeshje. Kemi bërë shumë gjëra të mira në muajt e fundit”, deklaroi ai.
Megjithatë, Carrick pranoi se, edhe pse para gazetarëve ishte i qetë, brenda vetes e kishte përjetuar rëndë humbjen.
“Po flas me ju mjaft i qetë, por besoni se brenda vetes nuk jam aspak i qetë dhe nuk po e shijoj këtë moment. Ka një ndryshim të madh mes të dyjave. Lojtarët në dhomën e zhveshjes po vuajnë dhe të gjithë e dimë se duhet të jemi shumë më të mirë”, tha ai.
Humbja ishte një goditje e fortë për optimizmin që e rrethonte Unitedin pas sezonit të kaluar dhe merkatos së verës. Skuadra e Carrickut kishte përfunduar sezonin e kaluar në vendin e tretë, ndërsa ardhjet e Youri Tielemans dhe Andrey Santos kishin rritur pritshmëritë. Por në Hull, të dy mesfushorët e rinj patën një debutim të vështirë dhe u zëvendësuan në pjesën e dytë.
