Profesori, veprimtari i njohur dhe një nga figurat që ka qenë pjesë e proceseve të rëndësishme kombëtare, Riza Krasniqi, në një intervistë të gjatë dhe emocionale për INKLIK Media, ka rrëfyer momente të veçanta nga jeta e tij, angazhimin në çështje kombëtare, sfidat e Kosovës ndër vite, si dhe arsyet që e shtynë të hyjë në politikë.
Duke folur për rrugëtimin e tij, Krasniqi kujtoi periudhën e viteve të vështira për Kosovën dhe angazhimin në lëvizjen gjithëpopullore të pajtimit të gjaqeve. Ai veçoi si një nga ngjarjet më të mëdha historike tubimin e Verave të Llukës, ku qindra mijëra shqiptarë u bashkuan për të përkrahur pajtimin dhe unitetin kombëtar.
Sipas tij, pajtimi i gjaqeve nuk ishte vetëm një proces i faljes mes familjeve, por një lëvizje që i dha popullit shqiptar forcë dhe shpresë në kohë të vështira. Profesori kujtoi edhe shumë raste prekëse, ku familje që për vite të tëra kishin jetuar në armiqësi, vendosën të shtrijnë dorën e pajtimit për hir të së ardhmes së kombit.
“Obligimet ndaj çështjes kombëtare nuk përfundojnë kurrë”, theksoi ai gjatë intervistës, duke nënvizuar se kontributi për vendin nuk lidhet me një periudhë të caktuar, por është detyrim i përhershëm.
Një pjesë e rëndësishme e bisedës iu kushtua edhe figurës së profesor Anton Çetës, prijësit të madh të lëvizjes së pajtimit të gjaqeve dhe njërit prej personaliteteve më të respektuara në historinë moderne të Kosovës. Krasniqi foli me keqardhje për faktin se realizimi i projektit për ngritjen e përmendores së Anton Çetës u zvarrit për një dekadë të tërë, ndonëse bëhet fjalë për një figurë që la gjurmë të pashlyeshme në historinë kombëtare.
Ai vlerësoi se shteti dhe shoqëria duhet të tregojnë më shumë kujdes për ruajtjen e kujtesës historike dhe për nderimin e personaliteteve që kanë kontribuar në momentet më vendimtare të vendit.
Në intervistë, Krasniqi ndau mendime edhe për gjendjen aktuale në Kosovë. Ai u shpreh se vendi ka bërë hapa të rëndësishëm përpara, por se ende ekzistojnë sfida të mëdha që kërkojnë angazhim serioz institucional dhe shoqëror.
Një nga temat që ai e trajtoi me optimizëm ishte rinia. Sipas tij, Kosova ka rininë më të mirë në botë dhe potenciali i saj nuk po shfrytëzohet sa duhet.
“Duhet të investojmë më shumë në arsim dhe te të rinjtë tanë. Ata që arrijnë të studiojnë në universitetet më prestigjioze botërore meritojnë mbështetje institucionale, ashtu siç meritojnë vlerësim edhe mësuesit dhe profesorët që kanë kontribuar në formimin e tyre”, u shpreh ai.
Duke folur për vendimin për t’u futur në politikë, Krasniqi tregoi se nuk ka qenë një hap i lehtë. Ai zbuloi se presidentja Vjosa Osmani ishte ndër personat që e bindi të përfshihej në garën zgjedhore, duke parë nevojën që njerëz me përvojë jetësore dhe profesionale të japin kontribut edhe në institucionet vendimmarrëse.
Sa i përket prioriteteve të tij, ai përmendi arsimin, mbështetjen për të rinjtë, fuqizimin e sistemit arsimor, respektimin e figurës së mësimdhënësit, si dhe angazhimin në procese pajtimi e çështje që ai i konsideron me rëndësi të veçantë kombëtare.
Në fund të intervistës, Riza Krasniqi dha edhe një mesazh për qytetarët në prag të proceseve demokratike:
“Dil dhe voto për atë që të ka zhgënjyer më së paku.”
Një intervistë që sjell para publikut jo vetëm kandidatin për deputet, por njeriun që për dekada ishte pjesë e proceseve historike të Kosovës, duke mbetur i lidhur me idealet e pajtimit, arsimit dhe shërbimit ndaj vendit.
