Kryetari i Partisë Demokratike të Kosovës, Bedri Hamza, ka shpërndarë në rrjetet sociale një video ku shihen përgatitjet e fundit të Rinisë Demokratike për Marshin e 17 Shkurtit – “Drejtësi, jo politikë”.
Në pamjet e publikuara, të rinjtë shfaqen duke përgatitur pankartat dhe mesazhet që do të përcillen gjatë marshit, ndërsa Hamza e ka shoqëruar videon me një mesazh të drejtpërdrejtë dhe simbolik:
“Pankartat i bënë gati. Mesazhi është i qartë: Drejtësi, jo politikë!
Krenar që kemi një rini që e do Kosovën dhe nuk hesht përballë padrejtësisë. Ky është një marsh që i bashkon qytetarët, sepse drejtësia është mbi çdo dallim politik.”
Marshi i 17 Shkurtit pritet të mbledhë qytetarë nga profile të ndryshme, me theks të veçantë në kërkesën për drejtësi të paanshme dhe mbi interesat politike, duke e kthyer këtë aktivitet në një mesazh qytetar dhe gjithëpërfshirës.
