Lajmi i fundit që ka tronditur botën e horologjisë është bashkëpunimi i papritur mes gjigantit të luksit Audemars Piguet dhe Swatch, një lëvizje që ka zënë në befasi të gjithë ndjekësit e modës dhe teknologjisë. Ajo që filloi si një thashethem misterioz në rrjetet sociale dhe vazhdoi me postime enigmatike në dritaret e dyqaneve Swatch anembanë botës, tashmë është konfirmuar zyrtarisht si një prej partneriteteve më të bujshme të vitit.
Përmes këtij projekti të përbashkët të titulluar “Royal Pop”, dy markat kanë vendosur të guxojnë duke rikthyer në vëmendje një aksesor klasik që mendohej se i takonte vetëm historisë. Koleksioni i ri nuk përfshin orë dore tradicionale, por prezanton tetë modele unike të orëve të gjepit, të cilat ndërthurin mjeshtërinë e lartë të Audemars Piguet me stilin urban dhe lojcak të Swatch. Ky bashkëpunim po krahasohet nga ekspertët me një shkrirje mes luksit të lartë dhe modës masive, duke zgjuar interesin edhe të personave që nuk janë njohës të rregullt të fushës së orëve.
Për të gjithë të interesuarit, shitja e këtij edicioni të limituar nis zyrtarisht nga data 16 maj. Për shkak të kërkesës së jashtëzakonshme që ka shoqëruar paralajmërimin e këtij koleksioni, kompanitë kanë vendosur rregulla strikte për blerjen e tyre. Orët do të jenë të disponueshme vetëm në dyqanet fizike të Swatch dhe çdo person do të ketë të drejtë të blejë vetëm një njësi në ditë. Kjo lëvizje pritet të krijojë radhë të gjata para pikave të shitjes, ndërsa adhuruesit e stilit klasik tashmë po bëhen gati të mbajnë në xhepat e tyre një pjesë të historisë moderne të modës.
