Kryeqyteti i Kosovës do t’i bashkohet edhe këtë vit festës globale të muzikës, “Fête de la Musique 2026”, me një organizim të veçantë kulturor që do të mbledhë qytetarët në qendër të Prishtinës. Mbrëmja festive do të mbahet më 21 qershor, duke filluar nga ora 18:00, në Sheshin “Skënderbeu”.
Sipas njoftimit zyrtar, hapjen e kësaj ngjarjeje madhore do ta bëjë Kori i Fëmijëve “Siparantum Kids”, i cili tashmë ka fituar zemrat e publikut me performancat e tij të veçanta. Menjëherë pas tyre, skena do t’i kalojë Qendrës Kulturore të Fëmijëve të Prishtinës, duke sjellë një energji tejet pozitive në zemër të qytetit.
Kulmi i mbrëmjes me Dren Abazin dhe Zig Zak Orkestrën
Pasi zërat e fëmijëve të hapin siparin e kësaj feste, atmosfera do të nxehet edhe më tej me ngjitjen në skenë të kantautorit të njohur shqiptar, Dren Abazi. I shoqëruar nga formacioni i tij i pandashëm, Zig Zak Orkestra, Abazi pritet të dhurojë një performancë elektro-vibrante me hitet e tij më të mira, duke e shndërruar natën e 21 qershorit në një moment të paharrueshëm për adhuruesit e muzikës së mirë.
Thirrja e organizatorëve: “Ju ftojmë të bashkoheni me ne për të festuar fuqinë bashkuese të muzikës dhe për të përjetuar së bashku magjinë e Fête de la Musique. Vive la musique!”
Ky aktivitet madhor kulturor organizohet nën patronazhin dhe bashkëpunimin e Ambasadës së Francës në Kosovë (Ambassade de France au Kosovo), Institutit Francez në Kosovë dhe Komunës së Prishtinës. Ngjarja është e hapur për të gjithë qytetarët që dëshirojnë të bëhen pjesë e këtij kremtimi tradicional ndërkombëtar.
