Brazili ka tërhequr ambasadorin e tij nga Argjentina në shenjë proteste, pasi presidenti argjentinas Javier Milei ofendoi presidentin brazilian Luiz Inácio Lula da Silva gjatë një vizite në Brazil.
Gjatë një tubimi politik në São Paulo, ku mori pjesë në nisjen e fushatës presidenciale të Flávio Bolsonaros, Milei iu referua Lulës si “hajdut” dhe “i dënuar”, pa ia përmendur emrin drejtpërdrejt. Ai deklaroi gjithashtu se Flávio Bolsonaro është i vetmi që mund ta “ndalë Lulën”.
Në shënjestër të presidentit argjentinas ishte edhe gjyqtari i Gjykatës Supreme të Brazilit, Alexandre de Moraes, të cilin e quajti “mbeturinë tullace”. Moraes kishte refuzuar kërkesën e Mileit për të vizituar ish-presidentin Jair Bolsonaro, i cili ndodhet në arrest shtëpiak pasi u dënua me mbi 27 vjet burg për planifikimin e një grushti shteti pas humbjes në zgjedhjet e vitit 2022.
Deklaratat e Mileit shkaktuan reagime të ashpra në Brazil. Një burim diplomatik brazilian, i cituar nga AFP, tha se presidenti argjentinas “ka fyer dy pushtete të shtetit, popullin brazilian dhe demokracinë braziliane”.
Përplasja konsiderohet si pika më e ulët në marrëdhëniet mes dy vendeve fqinje, të cilat janë ndër partnerët më të mëdhenj tregtarë të njëri-tjetrit.
