Policia e Malit të Zi ka njoftuar se gjatë një operacioni të gjerë për lokalizimin dhe kapjen e Vuk Vuleviqit nga Berana – i cilësuar si udhëheqës i një grupi të strukturuar kriminal (OKG) – ka ushtruar kontrolle në disa lokacione të përdorura nga anëtarët e këtij grupi me rrezikshmëri të lartë në veri të vendit.
Gjatë këtij aksioni të koordinuar, policia ka gjetur dhe sekuestruar kokainë, gëzhoja, predha të shkrepura, një target (metë) të improvizuar për qitje, si dhe një automjet terreni (katërrotak) që dyshohet se është kontrabanduar nga Kosova. Në pranga ka rënë një anëtar i këtij grupi kriminal.
Detajet e aksionit policor
Sipas njoftimit zyrtar, zyrtarët e Qendrës Rajonale të Sigurisë “Veri” (stacionet e policisë në Bijelo Polje, Kolashin dhe Beranë) kanë ndërmarrë një aksion të përbashkët në territorin e komunave Kolashin dhe Beranë. Qëllimi kryesor ishte gjetja e Vuleviqit, i cili kërkohet ndërkombëtarisht, si dhe kontrolli i objekteve në pronësi të personave të afërt me të.
- Bastisjet në Beranë: Policia ka kontrolluar objektet e dy anëtarëve të rangut të lartë të këtij grupi, Drashko Vukoviq dhe Vuk Ivanoviq. Në banesën e këtij të fundit është gjetur një sasi kokaine.
- Aksioni në Bjelasicë (Kolashin): Operacioni ka vijuar në zonën malore të Bjelasicës, konkretisht në fshatin Vranjeshticë, ku policia kishte informacione operative se anëtarët e grupit po qëndronin dhe po kryenin aktivitete të paligjshme. Aty është mësyrë shtëpia e pushimit në pronësi të Vuk Ivanoviqit.
Çfarë u gjet në shtëpinë e pushimit?
Në këtë objekt policia ka hasur vetë Vuk Ivanoviqin dhe një person tjetër me interes operacional, Vlajko Laban, po ashtu nga Berana, i njohur si autor i disa veprave penale.
Gjatë kontrollit brenda shtëpisë dhe krehjes së terrenit për rreth saj, u zbuluan:
- Një numër i madh gëzhojash pistolete dhe një metë e improvizuar për stërvitje me armë zjarri. Në trungun e pemës ku ishte vendosur shenja u gjetën dhjetëra predha të ngulura.
- Një automjet terreni (katërrotak) pa targa dhe pa dokumentacion pronësie. Policia dyshon se mjeti është sjellë nga territori i Kosovës përmes rrugëve dytësore malore, duke shmangur pikat zyrtare kufitare, me qëllim lëvizjen e shpejtë nëpër male.
- Një sasi tjetër kokaine dhe 16 tableta “Xanax” (Ksalol) pa recetë mjekësore.
Arrestimet dhe hetimet e mëtejshme
Gjatë ndërhyrjes së policisë, të dyshuarit Ivanoviq dhe Laban kanë fyer dhe nënçmuar efektivët, me ç’rast janë arrestuar fillimisht për shkelje të rendit dhe qetësisë publike.
Sa i përket drogës, Prokurori i Shtetit ka urdhëruar arrestimin e Vuk Ivanoviqit nën dyshimin për veprën penale “mundësim i konsumimit të drogave”, ndërsa ndaj Vlajko Labanit do të ngrihet padi për kundërvajtje administrative sipas Ligjit për parandalimin e abuzimit me drogat.
Paralajmërimi i Policisë: Gëzhojat, predhat, shenjat e qitjes dhe automjeti pa dokumente dyshohet se janë përdorur ose janë siguruar për planifikimin dhe përgatitjen e ndonjë vepre të rëndë penale. Të gjitha këto provat do t’i nënshtrohen ekspertizës mjeko-ligjore dhe balistike për të identifikuar planet dhe personat e tjerë të përfshirë./cdm.me/
