Trajneri i famshëm spanjoll, Pep Guardiola, ka konfirmuar zyrtarisht ndarjen me Manchester City-n, duke i dhënë fund epokës së tij në “Etihad” pas 10 viteve fantastike.
Si klubi, ashtu edhe vetë trajneri, njoftuan se bashkëpunimi do të mbyllet në fund të këtij sezoni. Gjatë kësaj periudhe, Guardiola fitoi plot 20 trofe dhe e udhëhoqi skuadrën drejt titullit të kampionit të Evropës dhe të botës.
Ndeshja e tij e fundit në stolin e Manchester City-t do të jetë këtë vikend kundër Aston Villa-s. Katalonasi, i cili iu bashkua City-t në korrik të vitit 2016, pati një ndikim transformues në klub, duke u shndërruar në menaxherin më të suksesshëm në historinë e tyre.
Deklarata e Guardiolës:
“Çfarë kohe të jashtëzakonshme kemi kaluar së bashku. Mos më pyesni për arsyet e largimit tim. Nuk ka një arsye specifike, por thellë brenda vetes e di se ky është momenti im. Asgjë nuk është e përjetshme. Ndjenja, njerëzit, kujtimet dhe dashuria që kam për Manchester City-n tim do të jenë të përjetshme”, tha Guardiola në komunikatën zyrtare.
Një epokë që mbyllet me suksese historike
Këtë vit, Guardiola nuk arriti të shpallej kampion i Anglisë, pasi titulli i takoi Arsenalit të drejtuar nga ish-ndihmësi i tij, Mikel Arteta.
- Trofetë e fituar me City-n: 6 tituj të Premier Ligës, 4 FA Cup, 5 Kupa të Ligës, 1 Ligë të Kampionëve, 1 Superkupë të UEFA-s dhe 1 Botëror për Klube.
Pavarësisht largimit nga pozita e trajnerit, Pep do të vazhdojë bashkëpunimin me “City Football Group”, duke marrë rolin e ambasadorit global, ku do të ofrojë këshilla teknike dhe do të punojë në projekte specifike për klubet e këtij grupi.
