Qyteti i Pejës do të jetë nikoqir i një serie garash ndërkombëtare të tenisit gjatë muajit gusht, ku do të zhvillohet turneu “Peja Open 2026”, me pjesëmarrjen e tenistëve të rinj nga vende të ndryshme.
Kampionati do të nisë më 10 gusht 2026 me garat e kategorisë Tennis Europe U14, të cilat do të zhvillohen deri më 16 gusht. Ky turne është pjesë e kalendarit evropian të tenisit për të rinjtë dhe është kategorizuar si Category 3 nga Tennis Europe.
Pas përfundimit të garave U14, në fushat e tenisit në Pejë do të vazhdojnë përballjet e nivelit ndërkombëtar me turnetë ITF J30 U18. Gara e parë ITF është planifikuar nga 17 deri më 23 gusht, ndërsa edicioni i dytë do të mbahet nga 24 deri më 30 gusht 2026.
Përmes këtyre tri javëve të garave, Peja do të mirëpresë sportistë të rinj që synojnë të fitojnë pikë ndërkombëtare dhe të ndërtojnë karrierën e tyre në skenën e tenisit evropian dhe botëror. Turnetë ITF J30 janë pjesë e World Tennis Tour Juniors, duke u dhënë mundësi talenteve të reja të renditen në sistemin ndërkombëtar të juniorëve.
Organizimi i “Peja Open 2026” pritet të jetë një tjetër ngjarje e rëndësishme sportive për qytetin, duke e vendosur Pejën në hartën e garave ndërkombëtare të tenisit dhe duke promovuar infrastrukturën sportive të Kosovës.
