Pamje apokaliptike të tymit të dendur, helmues dhe flakëve janë përhapur prej ditësh në qytetin e Tuapses në Detin e Zi, i cili dje u bë shënjestër e dronëve ukrainas për herë të katërt brenda dy javësh. Sipas CNN, zjarret pas sulmeve u shuan pas disa ditësh dhe shkaktuan katastrofën më të rëndë ekologjike në rajon në vitet e fundit.
Tuapse, i ndodhur rreth një qind kilometra në veri-perëndim të Soçit, është pjesë e një zone pushimi subtropikale e njohur si “Riviera Ruse”. Rafineria e qytetit, e lidhur me terminalin detar, është një qendër kyçe për përpunimin dhe eksportin e naftës ruse dhe muajt e fundit ka qenë shënjestër e përsëritur e sulmeve ukrainase.
