Kancelari gjerman Friedrich Merz ka ndërmarrë një riorganizim të rëndësishëm në qeveri, duke ndryshuar disa nga postet më të larta ekzekutive, në përpjekje për të përmirësuar imazhin e një qeverie që po përballet me kritika dhe rënie të mbështetjes së qytetarëve.
Merz njoftoi se ministrja e Shëndetësisë, Nina Warken, do të largohet nga ky post për t’u emëruar në Zyrën e Kancelarit, ku do të zëvendësojë Thorsten Frein. Ky i fundit pritet të marrë drejtimin e grupit parlamentar të CDU në Bundestag.
Në krye të Ministrisë së Shëndetësisë do të emërohet sekretari i përgjithshëm i CDU-së, Carsten Linnemann, ndërsa Philipp Amthor do të marrë detyrën e ministrit shtetëror për marrëdhëniet mes qeverisë federale dhe landeve.
Riorganizimi vjen pjesërisht pas dorëheqjes së Jens Spahn nga drejtimi i grupit parlamentar të CDU-së. Vendimi i tij u mor pas reagimeve publike lidhur me faktin se ai dhe bashkëshorti i tij u bënë prindër përmes një procesi të surrogacisë, një çështje që ka shkaktuar debat edhe brenda partisë së tij.
Sipas raportimeve të mediave gjermane, ndryshimet në qeverinë e Merzit mund të mos ndalen këtu. Gazeta Bild raporton se kancelari po shqyrton edhe shkarkimin e ministrit të Transportit, Patrick Schnieder, për shkak të pakënaqësive me punën në këtë sektor, veçanërisht me ritmin e dobët të modernizimit të infrastrukturës hekurudhore.
Merz thuhet se është i pakënaqur jo për mungesën e fondeve, por për ritmin e zbatimit të projekteve. Ndërkohë, ministrja e Ekonomisë dhe Energjisë, Katherina Reiche, raportohet se ka marrë një paralajmërim për performancën e saj.
Kancelari gjerman mori drejtimin e qeverisë më pak se 15 muaj më parë, duke premtuar reforma të mëdha dhe ringjalljen e ekonomisë më të madhe të Evropës pas një periudhe të gjatë stagnimi. Megjithatë, rezultatet e premtuara ende nuk kanë bindur votuesit.
Koalicioni qeverisës i përbërë nga blloku konservator CDU/CSU dhe SPD po përballet me presion në rritje, sidomos para zgjedhjeve rajonale, ku forcat e djathta ekstreme synojnë të fitojnë për herë të parë drejtimin e një landi.
Ndryshimet në kabinet shihen si përpjekje e Merzit për të stabilizuar qeverinë dhe për të rikthyer besimin e elektoratit përpara sfidave të ardhshme politike.
