Marmota Punxsutawney Phil, “parashikuesi” i njohur i motit nga shteti amerikan i Pensilvanisë, në Ditën e Marmotës doli nga strofulla e tij për të dhënë parashikimin vjetor.
Sipas tij, dimri do të zgjasë edhe gjashtë javë. Sipas legjendës, nëse marmota më 2 shkurt sheh hijen e saj, kjo nënkupton edhe gjashtë javë dimër. Nëse nuk e sheh hijen, pritet një pranverë e hershme.
Festimi më i njohur i Ditës së Marmotës në Shtetet e Bashkuara mbahet në kodrën e njohur si Gobbler’s Knob, në qytetin Punxsutawney në perëndim të Pensilvanisë. Qindra persona u mblodhën herët në mëngjes për festime me muzikë, vallëzim dhe fishekzjarre.
Sipas Pennsylvania Groundhog Club, organizatës që kujdeset për Phil-in dhe organizon ceremoninë, kjo traditë e ka origjinën në festimet e krishtera në Evropë.
Kjo organizatë është themeluar në vitin 1887 dhe ishte e para që organizoi festën në kodrën Gobbler’s Knob, raporton agjencia Reuters.
