Bedriya Adem, një 35-vjeçare nga Etiopia, ka përjetuar një nga mrekullitë më të rralla të mjekësisë duke sjellë në jetë pesënjakë pas 12 vitesh përpjekje të pandërprera për të mbetur shtatzënë. Lajmi është konfirmuar nga Spitali “Hiwot Fana”, ku mjekët njoftuan se nëna dhe pesë foshnjat e saj janë nën mbikëqyrje të rreptë mjekësore, por gëzojnë shëndet të plotë.
Lindja e katër djemve dhe një vajze u kreu përmes një operacioni cezarian, ndërsa foshnjat peshojnë midis 1.3 dhe 1.4 kilogramë. Drejtori i spitalit, Mohammed Nur Abdulahi, shpjegoi për BBC-në se kjo shtatzëni është veçanërisht e jashtëzakonshme pasi është konceptuar në mënyrë krejtësisht natyrale. Sipas statistikave mjekësore, rasti i ngjizjes natyrale të pesënjakëve është jashtëzakonisht i rrallë, duke ndodhur mesatarisht në vetëm një në 55 milionë raste.
Mes emocioneve të forta, Bedriya Adem u shpreh se pas më shumë se një dekade pritjeje, lumturia e saj është e papërshkrueshme. Ajo rrëfeu se rrugëtimi i saj ishte shumë i vështirë dhe i mbushur me sprova, por besimi nuk e la kurrë. “Luta Zotin për vetëm një fëmijë, por Ai më dha pesë”, u shpreh ajo, duke treguar se fillimisht mjekët i kishin thënë se priste katër fëmijë, për t’u surprizuar më pas me të pestin gjatë lindjes.
Prindërit tashmë i kanë pagëzuar fëmijët me emrat Naif, Ammar, Munzir, Nazira dhe Ansar. Ndonëse nëna pranoi se rritja e një familjeje kaq të madhe do të jetë një sfidë e vërtetë financiare, ajo beson se me mbështetjen e komunitetit dhe të autoriteteve, do t’ia dalin mbanë. Ky lajm ka shpërthyer në rrjetet sociale, duke u kthyer në një simbol shprese për miliona njerëz që përballen me sfida të ngjashme.
