Kryeshefi Ekzekutiv i Kompanisë Rajonale të Ujësjellësit “Hidrodrini”, ing. Dri Cena, ka zhvilluar një takim pune me kryetarin e Komunës së Klinës, Zenun Elezaj. Në fokus të këtij diskutimi kanë qenë investimet kapitale në sektorin e ujësjellësit dhe projektet zhvillimore, të cilat synojnë përmirësimin e drejtpërdrejtë të furnizimit me ujë të pijshëm për të gjithë konsumatorët e kësaj komune.
Gjatë takimit, palët kanë shqyrtuar në detaje projektet aktuale si dhe ato që janë planifikuar për periudhën në vijim. Vëmendje e veçantë i është kushtuar nevojës për zgjerimin e rrjetit të ujësjellësit, rritjen e kapaciteteve furnizuese dhe avancimin e përgjithshëm të infrastrukturës ujore në tërë territorin e Klinës. Ky koordinim pritet të ndikojë direkt në rritjen e efikasitetit të sistemit dhe në krijimin e kushteve më të mira të jetesës për banorët.
Kryeshefi Cena dhe kryetari Elezaj e vlerësuan bashkëpunimin ndërinstitucional si një hap kyç dhe të domosdoshëm për realizimin e këtyre investimeve. Sipas tyre, vetëm përmes një partneriteti të qëndrueshëm mund të sigurohet një furnizim stabil dhe rritje e cilësisë së shërbimeve të cilat prekin direkt xhepin dhe mirëqenien e qytetarëve.
Ky takim shënon fillimin e një dinamike të re të koordinimit në terren, pasi Zyra për Media e KRU “Hidrodrini” ka bërë të ditur se takime të këtij niveli do të realizohen përgjatë ditëve të ardhshme me të gjithë kryetarët e komunave që hyjnë në zonën e mbulueshmërisë së kompanisë.
