Gruaja që u bë virale pasi u filmua duke u puthur me shefin e saj në koncertin e Coldplay, ka deklaruar se ka ndërprerë çdo kontakt me të për shkak të, siç thotë, “mungesës së madhe të sinqeritetit dhe integritetit”. Kristin Cabot, e cila së bashku me drejtorin Andy Byron u pushuan nga puna në kompaninë Astronomer pas incidentit, tani ka folur për ngjarjen që ia ndryshoi jetën verën e kaluar.
“Nuk ishte personi për të cilin prezantohej”
Në një fragment që promovon një podcast të Oprah Winfrey, Cabot zbuloi se ditën e koncertit kishte marrë një mesazh nga vajza e saj, e cila i kishte treguar se aty ndodhej edhe bashkëshorti i saj Andrew, nga i cili ishte në proces ndarjeje. “Sapo po hyja në koncert, vajza më shkroi: ‘Shumë mirë, do të thotë që edhe ti edhe babi jeni në koncertin e Coldplay’”, tregoi ajo.
Cabot më pas kuptoi se do të kishte qenë më mirë të ishin takuar më herët për të shmangur situatat e pakëndshme. Ajo pretendon se me ish-shefin Byron nuk kishte qenë në lidhje intime dhe se puthja atë mbrëmje ishte e para. Konfirmoi se nuk janë më në kontakt dhe se vitin e kaluar “e ndërpreu komunikimin” me të.
“Ai nuk ishte personi për të cilin prezantohej dhe gënjeshtra për mua është e papranueshme”, tha ajo. “Shumë gjëra që më tha thjesht nuk ishin të vërteta.” Ajo nuk deshi të japë detaje për gënjeshtrat, duke thënë se e di si është kur jeta private bëhet publike, dhe u bëri thirrje njerëzve të ndalojnë së dërguari kërcënime me vdekje.
Incidenti ndodhi më 15 korrik të vitit të kaluar, kur Byron dhe Cabot u filmuan në koncert. Në momentin kur pamja e tyre u shfaq në ekranin e madh, çifti u përpoq të fshihej me shpejtësi, por atë moment e regjistroi një vizitore tjetër, Grace Springer, dhe e publikoi në rrjetet sociale. Videoja u bë virale me shpejtësi.
