Një vendim me peshë të madhe politike dhe kushtetuese është marrë sot nga Gjykata Kushtetuese e Republikës së Kosovës, e cila ka shpallur se dekreti i Presidentes për shpërndarjen e Kuvendit nuk prodhon asnjë efekt juridik.
Rasti u inicua nga kërkesat e bashkuara të Kryeministrit Albin Kurti dhe deputetes Arbërie Nagavci me 30 deputetë të tjerë, të cilët kërkuan vlerësimin e kushtetutshmërisë së dekretit presidencial.
Gjykata vendosi njëzëri që:
• Dekreti për shpërndarjen e Kuvendit është i pavlefshëm juridikisht
• Deputetët kanë 34 ditë afat për të zgjedhur Presidentin e ri
• Nëse dështon zgjedhja, Kuvendi shpërndahet automatikisht dhe vendi shkon në zgjedhje të parakohshme brenda 45 ditësh
Po ashtu, masa e përkohshme e vendosur më 9 mars është shfuqizuar, ndërsa aktgjykimi hyn në fuqi menjëherë.
Ky vendim pritet të ndikojë drejtpërdrejt në zhvillimet politike në vend, duke rikthyer fokusin tek zgjedhja e Presidentit dhe duke hapur rrugën për zgjedhje të reja nëse nuk arrihet konsensus brenda afatit kushtetues.
