Drejtori i Përgjithshëm i Policisë së Kosovës, kolonel Gazmend Hoxha, i shoqëruar nga stafi i tij i lartë menaxhues, ka zhvilluar një vizitë zyrtare në Shqipëri, ku u prit me nderime të larta nga Drejtori i Përgjithshëm i Policisë së Shtetit, Drejtues Madhor Skënder Hita. Ky takim ka shënuar një hap të rëndësishëm në koordinimin strategjik dhe operacional mes strukturave të sigurisë së të dyja vendeve.
Në kuadër të kësaj vizite, e cila u vlerësua e një rëndësie të veçantë për sigurinë kombëtare dhe rajonale, u nënshkrua zyrtarisht marrëveshja e përbashkët për organizimin e shërbimeve të policimit rrugor. Ky akord synon rritjen e parametrave të sigurisë në akset rrugore përgjatë sezonit turistik të këtij viti, duke garantuar një qarkullim më të sigurt për qytetarët dhe pushuesit e shumtë.
Përveç takimeve operacionale, delegacioni i Kosovës vizitoi edhe Akademinë e Sigurisë të Policisë së Shqipërisë. Gjatë kësaj ndalese, kolonel Hoxha dhe stafi i tij u pritën nga Rektori, Prof. Dr. Ilirjan Mandro, me të cilin u diskutua gjerësisht mbi zgjerimin e bashkëpunimit në fushën e trajnimeve dhe akademisë policore.
Në ambientet e këtij institucioni, Drejtori Gazmend Hoxha mbajti një ligjëratë të hapur përpara studentëve dhe kadetëve të ardhshëm. Gjatë fjalës së tij, ai bëri një ekspoze të punës, arritjeve dhe objektivave strategjike të Policisë së Kosovës. Vëmendje e veçantë gjatë ligjëratës iu kushtua menaxhimit profesional dhe reagimit taktik të forcave të sigurisë së Kosovës gjatë sulmit terrorist në Banjska, rast ky që u mor si shembull i lartë i profesionalizmit në terren.
Në mbyllje të vizitës, drejtuesit e të dyja policive rikonfirmuan zotimin e tyre të palëkundur për të thelluar bashkëpunimin e ndërsjellë në të gjitha fushat me interes të përbashkët, duke e vënë theksin te luftimi i kriminalitetit dhe garantimi i rendit publik në të dyja anët e kufirit.
