Pas shpalljes së rezultateve zgjedhore dhe humbjes së kryeministrit shumëvjeçar hungarez, Viktor Orban, rrugët e Budapestit u pushtuan nga festimet për atë që shumë e konsiderojnë një kthesë historike. Mirëpo, ndërsa një pjesë e shtetit feston fundin e një ere 16-vjeçare, në prapaskenë ka nisur një proces krejtësisht tjetër: një tërheqje e shpejtë dhe e heshtur e kapitalit dhe njerëzve që ndërtuan pasuritë e tyre gjatë kësaj periudhe.
Sipas informacioneve nga mediat ndërkombëtare, avionë privatë të lidhur me rrethin e ngushtë të pushtetit në largim po nisen me shpejtësi nga aeroportet pranë kryeqytetit. Destinacionet e preferuara për “shpëtimin” e miliardave raportohet të jenë Arabia Saudite, Omani dhe Emiratet e Bashkuara Arabe, por edhe vende të largëta si Australia dhe Singapori, raporton britanikja The Guardian.
Peter Magyar bën thirrje për arrestime urgjente
Kryeministri i ri, Peter Magyar, partia e të cilit “Tisza” korri një fitore bindëse, ka paralajmëruar se po ndodh një përpjekje sistematike për të mbrojtur pasuritë e dyshimta nga hetimet e ardhshme.
“Oligarkët e lidhur me Orbanin po transferojnë aktualisht dhjetëra miliarda forinta,” deklaroi Magyar.
Ai i ka drejtuar një thirrje dramatike prokurorisë, policisë dhe organeve tatimore që të reagojnë menjëherë, të parandalojnë largimet dhe të ndalojnë personat e dyshuar sa nuk është vonë. Sipas tij, disa familje ndikuese të partisë Fidesz kanë braktisur tashmë vendin, duke çregjistruar fëmijët nga shkollat dhe duke organizuar largimin e tyre të përhershëm.
“Asgjësimi i gjurmëve” dhe strehimi në SHBA
Magyar e ka përshkruar Hungarinë nën udhëheqjen e Orbanit si një shtet “të plaçkitur, të tradhtuar dhe të rrënuar”, duke e cilësuar si një nga anëtarët më të korruptuar të Bashkimit Evropian. Alarmante mbeten raportet nga ministritë për shkatërrimin masiv të dokumentacionit në javët para dorëzimit të pushtetit.
Edhe pse qeveria në largim i quan këto akuza “të tepruara dhe absurde”, tensioni mbetet i lartë. Vetë Viktor Orban ka njoftuar se nuk do të pranojë mandatin e deputetit, por do të mbetet në krye të Fidesz-it.
Ndërkohë, një pjesë e elitës politike po kërkon shpëtim në Shtetet e Bashkuara. Lidhjet e ngushta të Orbanit me lëvizjen MAGA të Donald Trump duket se po shërbejnë si një “rrugë shpëtimi”. Raportohet se vetë Orban planifikon të qëndrojë disa javë në SHBA, ku vajza dhe dhëndri i tij tashmë janë vendosur në New York që prej vitit të kaluar.
