Agron Nikçi do të vazhdojë të mbetet edhe për një mandat në krye të Drejtorisë për Punë Komunale dhe Shërbime Publike në kabinetin e kryetarit të Komunës së Pejës, Gazmend Muhaxheri.
Riemërimi i Nikçit vjen si vazhdimësi e angazhimit të tij në këtë dikaster, ku gjatë mandatit të mëparshëm ka qenë përgjegjës për menaxhimin e projekteve infrastrukturore, mirëmbajtjen e hapësirave publike dhe ofrimin e shërbimeve komunale për qytetarët e Pejës.
Në zgjedhjet e fundit lokale, Nikçi ka qenë në top 5-shen e më të votuarve në listën e LDK-së në Pejë.
Nga Komuna e Pejës bëhet e ditur se vazhdimësia në udhëheqjen e kësaj drejtorie synon stabilitet institucional dhe realizimin e projekteve të planifikuara në fushën e shërbimeve publike dhe zhvillimit urban.
Agron Nikçi, edhe në mandatin e ri, pritet të fokusohet në përmirësimin e infrastrukturës komunale, rritjen e efikasitetit të shërbimeve publike si dhe adresimin e kërkesave të qytetarëve në këtë sektor me rëndësi të veçantë për jetën e përditshme në komunë.
