Gjykata Themelore në Prishtinë e ka shpallur fajtor Arsim Sylën për veprën penale vrasje e rëndë në bashkëkryerje, lidhur me ngjarjen e ndodhur në vitin 2023 në qendrën tregtare Interex në Podujevë.
Trupi gjykues e ka dënuar Sylën me 22 vjet burgim, duke vlerësuar se veprimet e tij kanë pasur rol vendimtar në kryerjen e krimit.
Sipas Prokurorisë, më 11 shtator 2023, Arsim Syla dhe djali i tij i mitur – i cili aktualisht ndodhet në arrati – kishin shkuar në një kafiteri brenda qendrës tregtare “Interex”. Rreth orës 12:19, ata kishin vërejtur tani të ndjerin V.B., i cili po hynte në market së bashku me bashkëshorten L.S. dhe fëmijën e tyre katërvjeçar.
Aktakuza përshkruan se, pas kësaj, Syla dhe i mituri kishin dalë nga restoranti, ku babai e kishte orientuar djalin drejt viktimës. Sipas Prokurorisë, i mituri e kishte ndjekur viktimën, ndërsa Syla kishte vazhduar të largohej nga objekti.
Ngjarja kishte kulmuar në sektorin e bylmetit të marketit, ku i mituri i ishte afruar nga prapa viktimës dhe kishte shtënë dy herë me armë zjarri, duke i shkaktuar plagë vdekjeprurëse, në prani të bashkëshortes dhe fëmijës së viktimës.
Gjykata ka vlerësuar se roli i babait në orientimin dhe shtytjen e të miturit për kryerjen e veprës penale përbën bashkëkryerje, çka ka ndikuar drejtpërdrejt në lartësinë e dënimit. Vendimi nuk është ende i formës së prerë dhe palët kanë të drejtë ankese në instancat më të larta.
